تعبت اضحك واجاملها وانا حزنٍ يشق الروح
تعبت افرح وانا حزني رسمني دمع يبكيها
انا لو دمعتي تحكي خفايا همي المفضـوح
لك الله دمعــتي تعجـــز تبين وش مبكيها
انا كلي حزن ..كلي الم.. كلي وجع مع نوح
انا ياغايتي حفنــة مـواجــــع وش يداويهـا
انا ياغايتي تالي شموخ وصوتي المبحـوح
يجــاوب دمعة عيون ٍ تعبت اصبر واداريها
انا عمرٍ قضا نحبه توفــى في فؤاده روح
انا كلـي على بعضي مواجــع هم مخفيها
انا مليت ياعمر نزفته للطـــريق جروح
انا مليت ياقلـبٍ همومـــــك وش دواعيهــا
انا مليت امثلّك فرح مسرح وطـفل مزوح
وانا من وين ماراحت اشوف الحزن ناصيها
انا تالي وهم عمرٍ نوى يبنـي غلاه صروح
وانا ضحكة زمن غادر قتلني لجل يرضيهـا
حبيبي دامك مسافر وانا في نيتك مذبــوح
دخيلـك بس ابّين لك حقيقـــــة حب ناسيهـا
انا عمري على شانك وفي يدّك حبيب الروح
انا لو غبت ياعمــــري وش الدنيا واماسيها
